Románicu n'Asturies
Antoxana
L'interés pol
románicu debémos-ylu a Ana Pujades, ella diónos Hestoria del Arte na ESAD; la
cosa, nun sé si ella s'alcordará, vieno d'una desplicación sobre
estes coses del Arte Universal de les que tenemos tanta idea la
xente que facemos y ficimos la ESAD. Púnxonos les clásiques
dipositives pa comentar, y dióme por entrugá-y: "Ana, pero...
románicu, n'Asturies... nun hai mogollón? Ella díxonos que sí,
qu'había, que nun yera tan espectacular como'l d'otros llaos...
Nun se cuantes coses. Nun m'alcuerdo. pero lo que sí se-sabemos
ye que la entruga aquella, asina a lo xo, valió p'abrir una guapa xera d'investigación, al nuesu
nivel.
Inma y
yo entamamos con esta xera darréu, esto foi nel 2006, y más llueu apuntóse Cris. Esti ye'l resultáu
d'hores de camín, illusión, llitros de gasofa y dalguna botellina sidra. Y
ye una disculpa perbona pa caleyar per Asturies, un sitiu maraviosu pa ello,
onde'n cada curva atopes un paisaxe distintu; y de xuru que tamién un chigre
cerca, de los que fadremos tamién dalguna reseña como patrimoniu vivu que son. La
intención, que quede claro, nun ye emponderar dengún tema eclesiásticu; si del
gochu presten hasta los andares, de les ilesies namái que les
piedres.
Hai xente que diz
qu'el Románicu Asturianu nun ye tan importante como'l d'otres comunidaes. Ye
evidente que nun tamos falando del románicu palentín o cántabru, pero porque ye
"otru" románicu. Y eso yá quier dicir daqué cosa. Tien el so valir; y hai braeres maraviyes, n'edificios y
en detalles; y concentraciones ablucantes de monumentos románicos en delles
fasteres d'Asturies. Otru problema pal so reconocimientu y curiáu ye que los
mayores enfotos de l'alministración (mui insuficientes, por ciertu) en cuántique
a patrimoñu eclesiásticu llévaselos el Prerrománicu, que ye bayurosísimu, que ye
lo que se vende, y que ye lo más singular.
Pos trátase d'amuesar
daqué del patrimoniu asturianu que pamidea ye abondo bayurosu y conózse pocu, y
qu'a pocu que se tenga daqué de curiosidá, pue damos munches claves de lo que
pasó nesta tierra y per esta tierra, lo que fuimos y lo que somos. Más que la
custión artística, que tamién, foi la curiosidá de saber les coses que pasaben
equi n'Asturies nesi tiempu tan escuru y pocu conocíu de la Edá Media, sobre tóu;
foi eso más que nada lo que mos/m'emburrió a dir arrexuntando´l material qu'equí
vos ufrimos. Y foi una gueta bien prestosa.
Esti trabayu nun dexa
de ser eso, una esbilla material, una especie catálogu. El románicu ta abondo estudiáu, asina que
de momentu nun vamos facer tesis denguna; igual más alantre, sí. Otra cosa ye
que podamos dar opiniones so lo que nos paeza.
L'estáu en xeneral
del románicu asturianu ye llamentable. Nes semeyes, hai un pocu de tóo; munches
ilesies fueron camudando colos tiempos, pero interésanos amuesar tolo que
queda, (tolo que sepamos que queda y tolo que podamos recoyer, contando
restauraciones). Anque'l Románicu seya de lo que mas bayura hai nesta páxina, tamién
incluyimos más coses qu'abúltenmos interesantes: santuarios, daqué de prerrománicu (que, anque tea munchu mas reconocíu y curiáu,
merecíase dalgo más d'interés por parte de l'alministración, y que por otra
parte nós tampoco queremos comentar muncho, yá qu'hai munches
referencies); y tamién coses gótiques ya inclusive renacentistes.
Tamién facemos delles referencies a otra mena monumentos y a sitios prestosos.
Ná, qu'haber hai de tóo.
Falten coses, paeznos
que munches;
dirémosles añadiendo según vayamos enterándonos de qu'esisten, y tamién
meyorando la calidá de dalgunes semeyes. Nun ye una esculpa, la verdá que foi
una pena'; a la metá del trabayu esboroñóseme'l discu duru
esternu onde tenía tol material, asina que tuvi que componeme
como pudi.
Ya indicaremos, por supuestu, les
fontes de les cuales fuimos atropando información y otres onde nos paeza
qu'haiga datos d'interés.
A mín préstame velo nel mapa, porque danos una idea
mui gráfica de cuálos yeren los movimientos de la xente allá pelos sieglos VII-XIII.
N'esti mapa d'embaxo puedes
asitiate en cada ilesia o monumentu; en ca indicador hai una semeyuca y dalgo
d'información previa, y tamién un enllaz pa ver tola información (non
comentarios de testu) y más semeyes de caún
de los monumentos.
Sinón, nel cuadru d'al
delláu, ta la esbilla completa,
organizada por conceyos.
De mano, equí hai más de cien indicadores, y entá falta muncho. Casi nada.
Por supuestu, si daquién quier
collaborar, o apurrir dalgíun comentariu o lo que seya,
empobínese al corréu-e:
anton@nuntristeatro.com
Que vos preste.