Quién somos

En rematando los estudios d'Interpretación nel antiguu ITAE del Principáu decidimos arrincar con esta compañía, primero como agrupación semiprofesional en 1992, y más llueu definitivamente profesional nel 1997. 

Los nuesos enfotos yeran principalmente dos: la primera, crear n'Asturies una base pa la paulatina profesionalización tanto d'actrices o actores como directores, téunicos, músicos y demás oficios venceyaos col espectáculo, como alternativa a la cuasi obligada emigración a la que se ve empobinada cualesquier persona que quiera llabrase un futuru nesti oficiu y nesta Comunidá. La segunda tenía que ver col repertoriu; facemos espectáculos pa too tipu de públicu y d'estilu, lo que nos obliga en cierta manera a una formación constante. Y dientro d'esta estaya, quisimos atender, cuasi como una llinia d'investigación, al teatru asturianu y al fechu teatral en llingua asturiana; ello ye, buscar los sos percontios, les sos referencies y proponer nuevos temes y nuevos enfoques. 

Nuna primer etapa Producciones Nun Tris yera prácticamente una compañía d'actores; munchos de los espectáculos producíos taben dirixíos por directores de fuera d'Asturies, caún o caúna col so correspondiente métodu de trabayu. Posteriormente, y una vez remataos los estudios de Dirección escénica, decidimos asumir tamién el papel de directores d'escena. 

Creemos que la versatilidad y la capacidá d'asumir cuasi que cualesquier retu escénicu (si hai posibilidaes pa ello) ye una de les nueses fortaleces.

Más de cincuenta espectáculos producíos, pa too tipu de públicu y de tolos estilos. Clásicu, teatru y danza contemporáneo, ópera pa neños y neñes, comedia del arte, cai, zarzuela, drama, comedia...

D'estos cincuenta, más o menos la metá tienen el asturianu como llingua vehicular, siendo dalgunos billingües. 

Non sólo se trata de poner en pie espectáculos. Animaciones, presentaciones, cursinos, collaboraciones... Tolo qu'actores y directores son quien a facer..

Más de 150 persones pasaron pela compañía nestos años, como téunicos, artistes, xestores, músicos, directores... Gracies a ellos y a ellas crecimos, deprendimos y llegamos a ser lo que somos. 

Y prúyemos siguir siendo fieles, mientres seyamos quien, al nuesu oficiu, a la nuesa visión del teatru y a los nuesos ideales. Nesta web pues atopar muncha información sobre los espectáculos y actividaes, espublizaciones, o novedaes.

Recuerda que tamién pues contautar con nós en Facebook (https://www.facebook.com/produccionesnuntris/) aonde atoparás más material ya información.

En Youtube hai un canal de la compañía con vídeos de los espectáculos: https://www.youtube.com/user/nuntris/featured

Tamién tamos presentes en Twitter (@nuntristeatro) y n'Instagram (nuntristeatro).